agb

1. vertragsgägestand

bütsche verchauft die uf de homepage www.buetsche.ch azeigte produkt zu
de une ufgfüherte bedingige.


2. vertragsabschluss

de vertrag zwüsched em chäufer und BüTSCHE chunt zstand, wenn en chund via
mail oder bstellformular öbis bstellt und BüTSCHE de uftrag animmt.
bütsche nimmt de uftrag a, i dem de chund e mündlichi oder e schriftlichi
bestätigung (mail) überchunt. bitte ide täg nach de bstellig d mails läse.


3. produkt

alli Produkt vo bütsche sind einzelafertigunge und chönd drum liecht vom bild uf
de homepage abwiiche, z.b. i de farbe oder im muschterusschnitt. stimmt sbild und s produkt nöd genau überein, berechtigt das de chund nöd zur rückgab vom produkt.


4. mindeschtbstellmängi

es git kei mindeschtbstellmängi.

5. zahligsbedingige und versandchoschte

alli priise sind in schwiizer franke agäh, ohni verpackigs- und versandchoschte. die
werded separat verrächnet. es wird e rechnig mitgschickt. die isch zahlbar innert 30 täg nach erhalt vo de produkt.

versandchoschte berechnet sich us de choschte für porto, verpackigsmaterial und ufwand.

versandchoschte 1 produkt: 4.00fr. (grossbrief)

versandchoschte necessaire und zwei oder meh produkt: 10.00fr. (paket)

falls mehreri produkt chönd imme grossbrief versendet werde, wird uf de definitive rechnig de choschteunterschiid vom betrag abzoge. bütsch isch bemühet, d versandchöschte tüüf z bhalte.

6. liferbedingige

da d produkt uuftragsbezoge hergstellt werded, betreit d liferziit 1-2 wuche. wenn
es produkt schneller brucht wird, bitte speziell vermerke. bütsche bhalted sich vor, für express-ufträg en zueschlag z verlange (z.b. ide wiehnachtsziit oder wenn dadurch erhebliche mehrufwand entstaht).

d liferig vo de produkt erfolgt per poscht, im normalfall per a-poscht.


7. garantie

BüTSCHE übernimmt i de erschte 30täg d garantie für mängel. die garantie verfallt
30täg nach zuestelldatum und gilt nur für mängel ide verarbeitig.

zudem nimmt bütsch falsch bstellti produkt (falschi grössi, falsches muschter, falsches produkt) nur zrugg, wenn de fehler bi bütsche passiert isch. liit de fehler bim chund, chan es produkt nur nach absprach und nur under bestimmte umständ zrugg gäh werde. tipp: agabe uf de homepage genau läse und bi frage lieber vorgängig bi bütsche abkläre.

8. dateschutz

alli chundedate werded nöd a dritti witergäh und nur für de interni gebruch (versand
und kommunikation) brucht.